Sketch für zwei Personen (ältere Frau und junger Mann). Benötigte Requisiten: Jeweils Telefon, für die Frau Küchenutensilien und Schürze. Zu Anfang des Sketches sind die Personen getrennt.

Grad jezd schelld des blede Händi
wo i doch ebbes koche will
abber i muss hald scho nogeh'
sonsch isch des Ding erschd ned schdill.

Des isch jo mei Sohn de Georg
glei mol horche was der mechd
vielleicht kann der mir was bsorge
des wär mir dann wirglich rechd.

Hallo Georg Du Schlawiner
sag wo bisch denn Du jezd grad
kommsch Du grad von deiner Erwed
oder bisch Du in de Schdadt?

Mudder horch do isch de Georg
I ben uff em Weg zu Dir
und i hab mordsmäßich Hunger
was rechds zum Esse wünsch i mir.

Ach des isch jo prima Georg
weil i grad am Koche bin
No nemm i no e bissle extra
s'isch scho gnug für alle drin.

Mudder, i hab so en Hunger,
alles ess i – außer Lauch.
Lauch, den kann i net verbutze
der kommd mir net in mein Bauch

Georg, sag, wie war dei Arbeid,
hasch au ordentlich was gschaffd
und Dich eifrich blogt und eigsezd
mid Deinere volle ganse Krafd?

Mudder sag was gibd's zum Esse?
I hab Hunger wie en Bär
I hedd lengschd scho esse solle
wenn i no scho bei Dir wär.

Georg, sag, wo bisch denn du jezd
bisch beim Bäcker scho vorbei?
Vielleicht kennschd e Brod midbringe
gesch oifach zum Bäcker nei.

Mudder noi beim Bäcker ben i
leider vorhin scho vorbei
sag mir jezd: was gibbds zum Esse
I hab Hunger heid für drei!

Georg sag wo bisch denn du jezd,
wo kommsch her un was hasch gmachd?
Waisch no wie'd en gloine Bu warsch?
was hen mir do zamme glachd...

Mudder sag was gibbds zum Esse?
Bis grad war i uff em Bau
Bredder gschlebbd und Ladde gmesse
und jezd isch mir scho gans flau.

Wenn i kennd, däd i dir helfe
bei deim Heisle, glaubsch mir des?
Aber i ben ald und klabbrich
und des isch mir zu viel Schdress.

Mudder sag, was gibd's zum Esse
sag jezd endlich, sei so gud,
I ben wirglich furchdbar hungrich
und i grieg sonschd glei mei Wud.

Georg, Bieble, bleib gans ruich.
Waisch, die Ausschbroch fallt mir schwer.
Weil heit gibd's was uff franzesisch:
Porree avec Pomm de terr!

Mudder du des klingt fandasdisch
und i ben au glei bei Tisch
jezd mechd i jo blos no wisse
was des für a Esse isch.

Denk mol Georg, die Frau Maier
aus em iwwernächschde Haus
immer glozd se wie de Gaier
aus 'em Kichefenschder naus...

Mudder! Hald, i hab's verschdande
„Pommes de terres avec Porree“ –
des isch Lauch mid alde Grombier
des hald i ned aus! Ohje!

Lieber geh i Pizza esse,
Döner, Brodwurschd, irgendwas
Du hasch mi gans sche verseggelt
I hab Hunger, Du dein Schbass.